NALANTAD ngayong sa impeachment court ang ilang aktibidad na ginawa ni VP Sara Duterte na ginastusan ng confidential funds.
Sa mga dokumento na sinuri ni COA State Auditor Xylene Del Campo, ilan sa aktibidad na ginastusan ng confidential funds ay tree planting, Christmas parties, at road-safety events.
Milyon din ang ginastos sa security-related activities sa Davao City na balwarte nito.
Ayon kay Rep. Zia Alonto Adiong, spokesperson ng House prosecution team, bakit kailangan pang gumastos sa surveillance at information-gathering activities sa lugar na “safest haven” nito, ang Davao City.
Ayon naman kay Bukidnon Rep. Keith Flores na kasapi rin sa prosecution team, ang tree planting, Christmas parties at road-safety engagements ay hindi kabilang sa mga gawain na pwedeng paggamitan ng confidential funds.
