Popondohan ng ₱11.49 billion na increase sa proposed budget ng Department of Public Works and Highways (DPWH) para sa 2027 ang infrastructure projects na nakumpleto na kamakailan ang required documentation.
Paliwanag ni DPWH Secretary Vince Dizon, may ilang local road at flood mitigation projects na hindi kasama sa orihinal na ₱643.95-billion budget proposal ng ahensya dahil hindi pa nakaka-comply sa documentary at implementation requirements.
Binigyang-diin ni Dizon na lahat ng mga proyekto ay dapat sumailalim sa mahigpit na screening at tumalima sa requirements ng DPWH bago pondohan at maipatupad.
Noong Oct. 1 ay inirekomenda ng Budget Amendments Review Sub-Committee (BARSC) ng House Appropriations Committee ang karagdagang ₱11.49 billion para sa DPWH, kung saan mahigit kalahati nito ay inilaan para sa national road projects.
