Tinitiyak ng National Capital Region Police Office (NCRPO) sa publiko na ang paghahanda para sa 49th ASEAN Summit ay hindi lamang nakatuon sa seguridad ng mga ASEAN leaders at delegates, kundi maging sa kaligtasan at normal na pang-araw-araw na gawain ng mga mamamayan sa Metro Manila.
Sinabi ni NCRPO Officer-in-Charge Police Brigadier General Christopher Abrahano na patuloy na pinaiigting ang paghahanda para sa 49th ASEAN Summit at koordinasyon sa mga kaukulang ahensya ng pamahalaan at iba pang stakeholders.
Nauna nang dumalo si Abrahano sa inter-agency coordination meeting kung saan tinalakay sa pagpupulong ang mga hakbang upang matiyak ang maayos, ligtas, at matagumpay na pagdaraos ng regional gathering sa Nobyembre.
Kabilang sa mga dumalo sa meeting ang mga kinatawan ng bawat ahensya, kabilang ang Armed Forces of the Philippines, MMDA, Department of Tourism, at DILG.
Nakatuon ang pagpupulong sa pagpapalakas ng koordinasyon at pagtutulungan sa traffic management, mobility, seguridad, crowd management, at iba pang logistical requirements sa mga lugar na pagdarausan ng mga aktibidad na may kaugnayan sa ASEAN Summit.
