Dalawang auditor mula sa Commission on Audit (COA) ang pina-subpoena ng prosecution team sa Impeachment Court bilang karagdagang testigo laban kay VP Sara Duterte.
Sa open court manifestation ni House Lead Prosecutor Gerville Luistro, hiniling nito ang subpoena ad testificandum at subpoena duces tecum para kina Roderick C. Wamil, former state auditor ng COA Intelligence and Confidential Funds Audit Office (ICFAO), at Celine May L. Del Campo, ang present state auditor ng COA ICFAO.
Kasama rin sa pinapa-subpoena si Marivic Pareja, director ng House of Representatives Legislative Information Resources Management Department.
Sinabi ni Luistro na sina Wamil, Del Campo, at Pareja ang iuupong mga testigo sa witness stand sa Aug. 3, 4, at 5 kaugnay ng isyu ng confidential funds o Article 1.
Agad namang inatasan ni Impeachment Court Presiding Officer Chiz Escudero ang clerk of court na mag-isyu ng subpoena duces tecum at subpoena ad testificandum sa mga naturang personalidad.
