Kinumpirma na ni House impeachment manager at spokesperson Robert Ace Barbers na hindi na ipatatawag bilang testigo ng prosekusyon sa Article 1 sina Col. Raymund Dante Lachica at Ramil Madriaga.
Ayon kay Barbers, sapat na ang naging testimonya nina Gina Acosta, Lemuel Ortonio, Atty. Michael Poa at military officer na sina Col. Manarol Borasing at Col. Magtangol Panopio.
Klaro umano sa testimonya ng mga testigo na may misuse of confidential funds, maanomalyang liquidation, at gawa-gawang acknowledgment receipts.
Ayon naman kay Manila Rep. Benny Abante Jr., hindi naman impeachable officer ang mga subordinate officials kaya mas mainam kung mag-focus sila sa respondent.
Maging si Col. Nolasco ay posibleng hindi na rin ipatawag.
Sa September 7 to 9 hearing, ipina-subpoena ng prosekusyon sina COA employee Bresilio Sabaldan, former DepEd Asst. Sec. Sunshine Cherry Fajarda, at Police Maj. Jovelyn Magay.
Nananatili pa rin sa listahan ng testigo si DepEd SDO Eduard Fajarda at PSA official Marizza Grande.
Paglilinaw pa ni Barbers, kung papayag ang defense panel na i-stipulate ang ilang detalye gaya ng designation at duties ni Fajarda bilang SDO ng DepEd, posibleng hindi na rin nila ipilit na gawing hostile witness si Fajarda na ginagamot dahil sa stroke.
