Ang sakit sa puso ay isa sa mga pangunahing sanhi ng pagkamatay sa buong mundo.
Dahil may mga kaso na walang maagang babala, mahalagang makilala ang mga senyales na posibleng nagpapahiwatig na may problema sa puso.
Ayon sa mga health expert, isa sa mga karaniwang babala ang pananakit, paninikip o pakiramdam na may bigat sa dibdib. Maaari ring makaramdam ng hirap sa paghinga, lalo na kapag gumagawa ng pisikal na aktibidad o kahit nagpapahinga.
Kabilang din sa mga posibleng senyales ang madaling pagk pagod, pagkahilo, malamig na pagpapawis, pagduduwal at hindi karaniwang panghihina ng katawan.
Sa ilang kaso, ang pananakit ay maaaring kumalat mula sa dibdib patungo sa braso, balikat, likod, leeg o panga.
May mga tao ring nakararanas ng mabilis o hindi regular na pintig ng puso, na maaaring may kaugnayan sa problema sa ritmo ng puso.
Samantala, ang pamamaga ng mga binti, bukung-bukong o paa, kasama ng hirap sa paghinga kapag nakahiga, ay maaaring senyales ng heart failure o hindi sapat na pagpapadaloy ng dugo ng puso.
Paalala ng mga health expert, hindi lahat ng may sakit sa puso ay nakararanas ng lahat ng sintomas.
May mga taong banayad lamang ang nararamdaman o walang halatang senyales.
Kung makaranas ng paninikip o pananakit ng dibdib, hirap sa paghinga, malamig na pagpapawis o biglaang panghihina, lalo na kung magkakasabay ang mga ito, agarang tumawag sa emergency services at humingi ng medikal na tulong. Huwag maghintay na mawala ang mga sintomas.
Upang mapanatiling malusog ang puso, mahalagang kumain ng balanse at masustansiyang pagkain, regular na mag-ehersisyo, iwasan ang paninigarilyo, limitahan ang alkohol at regular na suriin ang presyon ng dugo, asukal sa dugo at kolesterol.
Tandaan, ang maagang pagtukoy sa mga babala at agarang pagpapatingin ay makatutulong upang maiwasan ang mas malubhang komplikasyon sa puso.
