SAN MARCELINO, Zambales – Anim na katao ang nasawi at tatlo pa ang nawawala matapos lumubog ang isang motorized na bangka sa Mapanuepe Lake sa Barangay Buhawen, San Marcelino, Zambales noong Agosto 27, 2026.
Ayon sa paunang ulat ng mga awtoridad, bandang 4:40 PM ng Huwebes, labintatlong (13) katao ang sakay ng isang motorized na banca na tumatawid sa lawa patungong Sitio Lumibao mula sa Buhawen Proper.
Ang grupo ay kagagaling lamang sa isang vaccination drive sa Barangay Health Center at dumalo rin sa isang pulong ng 4Ps (Pantawid Pamilyang Pilipino Program). Habang sila ay pauwi na, biglang lumubog ang bangka dahil sa sobrang dami ng sakay.
Apat na pasahero ang nakaligtas, habang anim ang nasawi—kabilang ang tatlong nakatatanda at tatlong bata. Tatlo pa ang hindi pa nakikita, kabilang ang isang 5-taong-gulang, isang 12-taong-gulang, at isang buntis na nasa hustong gulang.
Agad na tumugon sa insidente ang Municipal Disaster Risk Reduction and Management Office (MDRRMO) ng San Marcelino, ang San Marcelino Municipal Police Station, ang Bureau of Fire Protection (BFP) San Marcelino, at ang 2nd Provincial Mobile Force Company.
Sumama rin sa search, rescue, at retrieval operations ang mga opisyal at kawani ng Barangay Buhawen.
Patuloy na tinutukoy ng mga awtoridad ang mga biktima habang isinasagawa ang search and rescue operations sa lawa.
Subalit, pansamantalang sinuspinde ang operasyon bandang 6:45 PM dahil sa masamang panahon.
Ayon sa lokal na pamahalaan, nakatakdang ipagpatuloy ang paghahanap sa tatlong nawawalang katao sa sandaling maging ligtas na ang kondisyon para sa mga search and rescue personnel.
Mahigpit na pinaaalalahanan ang mga residente na iwasan ang pagsakay sa mga bangkong lampas sa kapasidad ng pasahero upang maiwasan ang mga ganitong trahedya.
