IGINIIT ni Senador Francis “Kiko” Pangilinan ang pangangailangan na maglaan ng ₱15 billion na supplemental budget para sa relief, rehabilitation, recovery, repair, and reconstruction efforts sa mga lugar na tinamaan ng lindol sa Mindanao.
Sa kanyang Senate Bill 2259, isinusulong ni Pangilinan ang paglalaan ng naturang pondo na kukunin sa available funds ng National Treasury.
Sinabi ni Pangilinan na prayoridad ang kapakanan ng mga apektado ng kalamidad sa Mindanao upang matiyak ang kanilang kaligtasan, magkaroon ng sapat na tulong mula sa gobyerno, at makabalik muli sa kanilang normal na buhay at hanapbuhay sa pinakamadaling panahon.
Ipinaliwanag ng senador na higit pa sa agarang tulong ang kailangan ng mga biktima ng lindol kundi mas kailangan nila ng matagalang suporta mula sa gobyerno para muli silang makabangon mula sa trahedyang ito.
Magsisilbing augmentation ang supplemental fund sa budget ng National Disaster Risk Reduction and Management Council upang matugunan ang pangangailangan ng mga apektadong lugar sa Mindanao.
Sa ilalim ng ipinapanukalang pondo, ₱2 billion ang ilalaan sa Department of Agriculture, ₱2 billion sa Department of Education, ₱1.5 billion sa Department of Social Welfare and Development, ₱500 million sa Department of Energy, at ₱1 billion sa state universities and colleges.
Bibigyan din ng ₱1.5 billion ang Department of Health, ₱1 billion sa DOH at concerned local government units, ₱1 billion sa Department of Public Works and Highways, ₱2 billion sa Department of Human Settlements and Urban Development at National Housing Authority, ₱500 million sa Department of Transportation at ₱2 billion for affected LGUs.
