Nagbabala ang mga eksperto sa kalusugan ukol sa pagdami ng kaso ng heat cramps habang patuloy na nararanasan ang mataas na temperatura sa bansa.
Ayon sa mga doktor, ang heat cramps ay biglaang pananakit at paninigas ng mga kalamnan, karaniwang nararamdaman sa mga binti, braso, o tiyan.
Ito ay sanhi ng matinding pagpapawis na nagdudulot ng pagkawala ng mahahalagang minerals tulad ng sodium at potassium sa katawan.
Kadalasang nangyayari ito sa mga taong matagal na nabibilad sa araw o nagsasagawa ng mabigat na aktibidad sa mainit na panahon, gaya ng mga manggagawa sa labas at mga atleta.
Pinapayuhan ng mga eksperto ang publiko na agarang huminto sa ginagawang aktibidad kapag nakaramdam ng paninigas ng kalamnan, lumipat sa malamig na lugar, at uminom ng tubig o inuming may electrolytes upang maibalik ang nawalang likido sa katawan.
Binigyang-diin din na mahalaga ang regular na pag-inom ng tubig, pag-iwas sa sobrang init ng araw, at pagsusuot ng magagaan na damit upang makaiwas sa mga karamdamang dulot ng init.
Paalala ng mga eksperto, bagama’t hindi karaniwang malubha ang heat cramps, maaari itong maging babala ng mas mapanganib na kondisyon tulad ng heat exhaustion at heat stroke kung hindi agad aagapan.
