Kabuuang 92 trial days sa impeachment case laban kay Vice President Sara Duterte ang inaprubahan ng Impeachment Court batay sa kanilang inilabas na pre-trial order.
Sa kautusan na pirmado ni Senate President Sherwin Gatchalian, nakasaad na magsisimula ang impeachment trial sa July 6 at idaraos ang paglilitis tuwing Lunes, Martes at Miyerkules, mula alas dos ng hapon hanggang July 27 na araw ng SONA ni Pangulong Ferdinand Marcos Jr.
Matapos ang SONA sa July 27, idaraos ang impeachment trial tuwing Martes, Miyerkules at Huwebes mula sa alas tres ng hapon.
Inaprubahan ng Impeachment Court ang hiling ng prosecution na 62 trial dates at 30 araw sa respondent o sa kampo ni VP Sara Duterte o kabuuan na 92 trial dates.
Para sa prosecution, nakasaad sa pre-trial order na 11 ang trial dates para sa uunahin nila na Article 4 na ukol sa pagbabanta ng Bise Presidente sa buhay ng Pangulo, First Lady Liza Araneta at dating House Speaker Martin Romualdez.
31 araw sa Article 1 na ukol sa sinasabing maling paggamit ng Bise Presidente ng confidential funds; 8 trial dates para sa Article 3 na ukol sa bribery and corruption at 12 trial dates sa Article 2 na ukol sa unexplained wealth, false SALN at continued business interests umano ni VP.
