Inaprubahan ng Department of Budget and Management (DBM) ang pagre-release ng mahigit 10 billion pesos na halaga ng public funds para suportahan ang implementasyon ng zero-balance billing (ZBB) program.
Inihayag ng DBM na malaking bahagi o 9.377 billion pesos ng kabuuang inaprubahang release ay inilaan para suportahan ang pagpapatupad ng ZBB program ng Department of Health (DOH) hospitals sa buong bansa.
Mula sa 9.377 billion pesos, sinabi ng Budget Department na 3.342 billion pesos ang inilaan para sa DOH hospitals sa Metro Manila.
Saklaw nito ang Amang Rodriguez Memorial Medical Center, Dr. Jose Fabella Memorial Hospital, East Avenue Medical Center, Jose R. Reyes Memorial Medical Center, National Center for Mental Health, National Children’s Hospital, Philippine Orthopedic Center;
Gayundin ang Quirino Memorial Medical Center, Research Institute for Tropical Medicine, Rizal Medical Center, San Lazaro Hospital, at Tondo Medical Center.
Ang natitira naman na 6.035 billion pesos ay gagamiting pang-suporta sa implementasyon ng ZBB sa DOH regional hospitals at iba pang government health facilities sa labas ng Metro Manila, upang maabot ng programa ang mga pasyente sa iba’t ibang panig ng bansa.
