Makararanas ang Ninoy Aquino International Airport sa Pasay City at labimpito pang lugar sa bansa ng “danger level” na heat index o damang init, ngayong Martes.
Sa pagtaya ng PAGASA, aabot sa 45 degrees Celsius ang heat index sa Sangley Point, Cavite City habang 44 degrees Celsius sa NAIA Pasay City; Masbate City; at CBSUA-Pili, Camarines Sur.
Inaasahan naman ang 43 degrees Celsius na damang init sa San Jose, Occidental Mindoro at Cuyo, Palawan.
Samantala, posibleng maramdaman ang 42 degrees Celsius na heat index sa Dagupan city, Pangasinan; Bacnotan, La Union; Iba, Zambales; Cubi Pt., Subic Bay, Olongapo City; Camiling Tarlac; Infanta, Quezon; Coron, Palawan; Daet, Camarines Norte; Roxas City, Capiz; Iloilo City; Dumangas, Iloilo; at Agromet, Musuam, Bukidnon.
