Nilinaw ni Justice Panel Chairperson Gerville Luistro na sa Lunes pa matapos ang botohan sa plenaryo, saka lamang sila bubuo ng House prosecution team.
Ito’y kung kakatigan ng mga kongresista ang House Resolution No. 989 o Resolution Setting Forth the Articles of Impeachment Against Vice President Sara Duterte.
Ayon kay Luistro, ihahalal ng plenaryo ang labing-isang kongresista na pawang abogado at magsisilbing taga-usig.
Ang House prosecution team ang sasabak sa impeachment trial sa Senado, at sila ay aassistihan ng kukuning private prosecutors o mga abogado na bihasa sa court proceedings.
Kabilang sa tinukoy ni Luistro na posibleng mapabilang ay si Manila Rep. Joel Chua, San Juan City Rep. Bel Zamora, Bukidnon Rep. Jonathan Keith Flores, 1-Rider PL Rep. Rodge Gutierrez, at si House Senior Deputy Majority Leader Lorenz Defensor.
Sina Defensor, Chua, Zamora, Flores, at Gutierrez ay mga orihinal na kasapi ng 2025 prosecution team.
Big addition naman sa team sina Rep. Leila de Lima ng ML PL at Rep. Chel Diokno ng Akbayan PL na kapwa batikang abogado.
