Hiniling ng House prosecution team na isyuhan ng subpoena ng Impeachment Court si Davao City Mayor Sebastian Duterte na kapatid ni Vice President Sara Duterte.
Ipinaliwanag ni Impeachment Court Spokesman Atty. Reginald Tongol, gagamiting testigo ng prosekusyon si Mayor Baste sa mga transaksyong pinasok ng city government ng Davao sa mga specific na korporasyon.
Kasama rin sa subpoena ang pagdadala ni Mayor Baste ng official records at kontrata mula 2020 ng city government sa Gencorp Industries at sa anumang entity na nagmamay-ari o nag-ooperate ng isang branch ng kilalang fast food.
Bukod sa kanya, pina-subpoena rin ng prosecution si Civil Service Commission Assistant Commissioner Atty. Ariel Ronquillo para tumestigo sa Lunes, September 21, ukol sa preparation at filing ng SALN at ukol sa kanyang role sa pagbalangkas ng guidelines para sa filing ng SALN.
Pinasa-subpoena rin si Rendel Sopeña, Division Team ng Phil. Govt. Electronic Procurement System para patestiguhin ukol sa procurement transactions ng mga entities na may idineklarang interest si VP Sara.
