Nagbabala ang mga eksperto sa kalusugan na parehong may dalang panganib sa katawan ang vaping at tradisyunal na paninigarilyo, sa kabila ng paniniwala ng iba na mas ligtas ang e-cigarettes.
Ayon sa mga doktor, ang mga karaniwang sigarilyo ay naglalaman ng libo-libong kemikal, kabilang ang nicotine, tar, at carbon monoxide na direktang nakakasira sa baga at puso.
Ito rin ang pangunahing sanhi ng lung cancer, chronic obstructive pulmonary disease o COPD, at iba pang malulubhang sakit.
Samantala, ang vape o e-cigarettes ay gumagamit ng liquid na pinapainit upang malanghap.
Bagama’t mas kaunti ang kemikal kumpara sa sigarilyo, naglalaman pa rin ito ng nicotine at iba pang mapanganib na substansya na maaaring makaapekto sa baga at utak.
Ipinapakita ng ilang pag-aaral na ang matagal na paggamit ng vape ay maaaring magdulot ng iritasyon sa baga, paghihirap sa paghinga, at pagtaas ng peligro ng sakit sa puso.
May mga naitalang kaso rin ng “vape-related lung injury” na nagdulot ng pagka-ospital ng mga gumagamit nito.
Binigyang-diin ng mga eksperto na parehong nakakaadik ang sigarilyo at vape dahil sa nicotine, na maaaring magdulot ng pagdepende at mahirap itigil sa paglipas ng panahon.
