Naranasan ka na ba ng pagkakapit o pagkakakulong ng daliri kapag ito ay ibinabaluktot at itinutuwid?
Maaaring ito ay senyales ng trigger finger, isang kondisyon na nakaaapekto sa paggalaw ng mga daliri sa kamay.
Ang trigger finger, na tinatawag ding stenosing tenosynovitis, ay nangyayari kapag namamaga o kumakapal ang tendon o litid na responsable sa pagbaluktot ng daliri.
Dahil dito, nahihirapan ang litid na dumaan sa makitid na daanan nito, kaya nagkakaroon ng pagkakapit o biglaang pagtalon ng daliri habang gumagalaw.
Ilan sa mga karaniwang senyales nito ang pananakit o paninigas ng daliri, lalo na sa umaga, pagkakaroon ng maliit na bukol sa palad sa may base ng apektadong daliri, at pagkalikot o pag-click nito kapag itinutuwid.
Sa mas malubhang kaso, maaaring maipit ang daliri sa nakabaluktot na posisyon at kailangang gamitin ang kabilang kamay upang maituwid ito.
Mas mataas ang panganib sa mga taong may diabetes at rheumatoid arthritis.
Mas karaniwan din ito sa mga nasa middle-aged at sa mga taong madalas nakararanas ng pagkakapit ng daliri, bagama’t hindi lamang paulit-ulit na paggamit ng kamay ang sanhi nito.
Ayon sa mga health expert, nakadepende sa kalubhaan ng kondisyon ang paggamot.
Maaaring magrekomenda ang doktor ng pagpapahinga sa kamay, pag-iwas sa mga gawaing nagpapalala ng sintomas, paggamit ng splint, o mga gamot na angkop sa pasyente.
Sa ilang kaso, maaaring kailanganin ang injection ng steroid o operasyon kung hindi umuubra ang iba pang paraan.
Pinapayuhan ang publiko na magpakonsulta kung patuloy ang pananakit, lumalala ang paninigas, o hindi na maituwid ang daliri. Huwag piliting ituwid ito kung matindi ang pananakit.
Sa tamang pagkilala at agarang paggamot, maaaring mapabuti ang paggalaw ng daliri at maiwasan ang paglala ng kondisyon.
