Hindi lamang pagkaantok at pagkahapo ang maaaring idulot ng kakulangan sa tulog. Kapag palaging hindi nakukumpleto ang kailangang oras ng pagpapahinga, naiipon ang tinatawag na sleep debt na maaaring magdulot ng masamang epekto sa pisikal at mental na kalusugan.
Ang sleep debt o sleep deficit ay ang pagkakaiba ng oras ng tulog na kailangan ng katawan at ng aktuwal na oras ng pagtulog.
Halimbawa, kung ang isang tao ay nangangailangan ng walong oras na tulog pero anim na oras lamang ang naitutulog niya bawat gabi, may dalawang oras siyang sleep debt sa isang araw. Kung magpapatuloy ito sa loob ng limang araw, aabot sa sampung oras ang naipong kakulangan sa tulog.
Kabilang sa epekto nito ang paghina ng memorya at concentration dahil mahalaga ang tulog sa pagproseso at pag-iimbak ng mga impormasyon sa utak. Kapag kulang sa tulog, maaaring mahirapan ang isang tao na mag-focus, mag-isip nang maayos at makapagdesisyon.
Maaari ring humina ang immune system. Sa panahon ng pagtulog, nagsasagawa ng mahahalagang proseso ang immune system upang labanan ang mga infection. Ang palaging kakulangan sa tulog ay maaaring magpahina sa depensa ng katawan laban sa mga sakit.
Magdudulot din ito ng pagtaas ng panganib sa high blood pressure at sakit sa puso. Ang chronic sleep deprivation ay iniuugnay sa pagtaas ng panganib ng hypertension, heart disease at stroke. Naaapektuhan din nito ang normal na pagpapahinga at pag-recover ng cardiovascular system.
Bukod dito, tataas din ang panganib sa diabetes. Ang kakulangan sa tulog ay maaaring makagambala sa pagkontrol ng blood sugar at sa paraan ng paggamit ng katawan ng insulin. Dahil dito, iniuugnay ito sa mas mataas na panganib ng type 2 diabetes.
Nagdudulot din ito ng pagbabago sa hormones at pagtaas ng gana sa pagkain. Kapag kulang sa tulog, maaaring magbago ang mga hormone na kumokontrol sa gutom at pagkabusog. Posibleng tumaas ang gana sa pagkain at pagnanasa sa mga pagkaing mataas sa calories, na maaaring magdulot ng pagdagdag ng timbang.
