Ang pagkakuryente o electrocution ay isang emergency na maaaring magdulot ng matinding paso, pagkasira ng mga nerbiyos at lamang-loob, pagkagambala ng tibok ng puso, at paghinto ng paghinga.
Ayon sa mga health expert, mahalagang malaman ang tamang first aid sa taong nakuryente upang maiwasan ang pagkakuryente rin ng mga taong tutulong.
Una, huwag agad hawakan ang biktima kung nakadikit pa ito sa pinagmumulan ng kuryente.
Maaari ring makuryente ang sinumang susubok na humawak dito habang may daloy pa ng kuryente.
Kung ligtas gawin, patayin ang main switch o circuit breaker upang maputol ang suplay ng kuryente.
Kung hindi matiyak na naputol na ang kuryente, lumayo sa lugar at tumawag sa emergency responders. Huwag lumapit o humawak ng nakabagsak na linya ng kuryente.
Kapag natiyak nang wala nang panganib, tingnan kung tumutugon at normal na humihinga ang biktima. Tumawag agad sa local emergency services.
Kung walang malay at hindi normal ang paghinga, simulan ang CPR kung may kaalaman sa tamang pamamaraan, at sundin ang mga tagubilin ng emergency dispatcher. Gumamit ng automated external defibrillator o AED kung mayroon at ligtas itong magagamit.
Kung may paso, takpan ito ng malinis at tuyong pantakip. Huwag lagyan ng yelo, mantika, toothpaste, o iba pang home remedies. Huwag ding punitin o alisin ang damit na dumidikit sa paso.
Mahalagang dalhin sa ospital ang sinumang nakuryente, kahit mukhang maayos ang kalagayan, dahil may mga pinsalang hindi agad nakikita at maaaring maapektuhan ang puso.
Tandaan, ang pinakamahalagang hakbang sa first aid sa pagkakuryente ay tiyaking ligtas muna ang lugar bago tumulong. Ang mabilis at tamang pagtugon ay maaaring makapagliligtas ng buhay.
