SUBIC BAY FREEPORT – Nasabat ng magkasanib na puwersa ng iba’t ibang ahensya ng pamahalaan ang 89 na sako/bag ng pinaghihinalaang kush/cannabis na nagkakahalaga ng Php106.8 milyon sa loob ng isang yate na may bandilang Malaysian na naka-dock sa Subic Bay Yacht Club (SBYC) noong ika-2 ng Setyembre 2026.
Ang nasabing sasakyang-dagat, na mula sa Kota Kinabalu, Sabah, Malaysia at patungong Taiwan, ay umano’y nakaranas ng sira sa makina sa gitna ng dagat at nagpadala ng distress signal bago ito nasagip at dinala sa SBYC noong ika-28 ng Agosto 2026 kasama ang apat na tripulante nito.
Natagpuan ang mga plastic bag na naglalaman ng pinaghihinalaang ipinagbabawal na gamot sa loob ng isang kompartim nito sa engine room ng yate.
Agad na iniulat ang natuklasang ito sa pamunuan ng SBYC kung kaya’t mabilis na kumilos ang mga awtoridad.
Noong ika-2 ng Setyembre 2026, nagsagawa ng inspeksyon ang isang joint task force na binubuo ng mga tauhan mula sa Bureau of Customs (BOC), Subic Bay Metropolitan Authority – Investigation and Intelligence Division (SBMA-IID), Legal and Enforcement Division (SBMA-LED), Philippine Drug Enforcement Agency (PDEA) Zambales, Olongapo City Police Drug Enforcement Unit (OCPDEU), Zambales Provincial Intelligence Team-RIU3, at Regional Intelligence Division-PRO3.
Isinagawa nila ang operasyon sa bisa ng isang Mission Order mula sa BOC upang lubusang suriin ang nasabing sasakyang-dagat.
Ang nasabat na pinaghihinalaang kush/cannabis na may timbang na 89 kilo at tinatayang halaga sa kalye na Php106.8 milyon ay nananatiling ipinapasuri sa laboratoryo upang makumpirma ang eksaktong klasipikasyon, kabuuang timbang, at aktuwal na presyo nito.
Ang lahat ng ebidensya ay maingat na naidokumento, na-inventory, at inilagay sa ilalim ng pangangalaga ng mga sangkot na ahensyang nagpapatupad ng batas para sa karagdagang proseso.
Samantala, patuloy ang paghahanap sa apat na tripulante ng yate upang maimbestigahan at malaman ang kanilang kaalaman at partisipasyon sa insidente.
Ang Olongapo City Police Office ang nangunguna sa paghahanap, sa tulong ng lokal at regional intelligence units.
