Nagbabala ang mga eksperto sa kalusugan sa dumaraming kaso ng kakulangan sa vitamin D o “vitamin D deficiency” na maaaring magdulot ng iba’t ibang suliranin sa katawan kung hindi agad matutugunan.
Ayon sa mga doktor, ang vitamin D ay mahalaga sa pagpapatibay ng mga buto at ngipin dahil tumutulong ito sa pagsipsip ng calcium sa katawan.
Kapag kulang ang vitamin D, maaaring humina ang mga buto at tumaas ang panganib sa mga sakit tulad ng osteoporosis at rickets.
Kabilang sa mga karaniwang sintomas ng kakulangan sa vitamin D ang madaling pagkapagod, pananakit ng mga kasu-kasuan at kalamnan, at paghina ng immune system na nagiging dahilan ng madalas na pagkakasakit.
Sa ilang kaso, nakakaranas din ng pagbabago sa mood tulad ng depresyon.
Ipinaliliwanag ng mga eksperto na isa sa mga pangunahing sanhi ng vitamin D deficiency ay ang kakulangan sa pagkabilad sa araw.
Dahil sa modernong pamumuhay na kadalasang nasa loob ng bahay o opisina, nababawasan ang natural na produksiyon ng vitamin D sa balat.
Maaari rin itong maiugnay sa hindi balanse na diyeta.
Ilan sa mga pagkain na mayaman sa vitamin D ay isda tulad ng salmon at tuna, itlog, gatas at cereal.
Pinapayuhan ng mga doktor ang publiko na magbilad sa araw ng 10 hanggang 20 minuto araw-araw, lalo na sa umaga, at panatilihin ang masustansyang pagkain.
