Matatanggap na ng Transport Network Vehicle Service (TNVS) drivers ang financial assistance mula sa Department of Social Welfare and Development ngayong Martes.
Kahapon ay inanunsyo ng Land Transportation Franchising and Regulatory Board ang payout sa kanilang social media, kung saan sinabing magsisimula ang distribusyon sa designated locations ngayong alas-7:00 ng umaga.
Maaaring tingnan ng TNVS drivers kung kasama ang kanilang pangalan sa listahan ng mga benepisyaryo sa link na ibinigay ng LTFRB.
Ang listahan ay batay sa datos na isinumite ng transport network companies, kabilang ang Grab, Utol, Toktok, Pure Ride, Maxim, JoyRide, InDrive, Hirna, Go Cab, Angcars, Unlala, Hail, Peekup, at Para Express.
Nilinaw ng LTFRB na hindi kasama sa listahan ang motorcycle taxi at delivery riders.
Ang ipamamahaging ayuda ay bahagi ng Assistance to Individuals in Crisis Situations (AICS) program ng DSWD na ipinatutupad sa pakikipagtulungan ng LTFRB.
