Itutuloy pa rin ng House Committee on Justice ang pagdetermina kung may probable cause ang dalawang impeachment complaint kay Vice President Sara Duterte.
Ito’y kahit hindi pansinin ni VP Sara ang ipapadalang notice para mag-reply ito kasunod ng pagdeklara na kapwa sufficient in subs-tance ang Saballa et al., at Cabrera impeachment complaint.
Ayon kay Justice Committee Chairperson Gerville Luistro, sakaling hindi mag-file ng sagot si Duterte, ituturing nila itong “denial” sa lahat ng alegasyong nakapaloob sa 2 verified impeachment raps.
Mahalaga na magpatuloy ang pagdinig para matukoy kung ito ay may probable cause.
Paliwanag pa ni Luistro, kapag nadeklarang may probable cause, dito na umano pagsasamahin o iko-consolidate ang dalawang impeachment complaint, hanggang sa maiakyat ito sa plenary para aprubahan ng buong Kapulungan.
Sa plenaryo kailangang aprubahan ang committee report, o kaya baligtarin ang nilalaman ng committee report sa pamamagitan ng one-third votes o 105.
Alin man sa dalawa ang mamayani, dito na bubuuhin ang Articles of Impeachment na siyang dadalahin sa Senado na aaktong impeachment court na lilitis kay VP Duterte.
