Hinimok ng TRABAHO Partylist ang pamahalaan na maging handa sa sakuna matapos ang mapaminsalang lindol na may lakas na 7.7 magnitude na yumanig sa gitnang Myanmar at kalapit na Thailand noong Marso 28, 2025.
Ayon kay TRABAHO Partylist spokesperson Atty. Mitchell-David L. Espiritu, mahalaga ang mahigpit na pagpapatupad ng Building Code at workplace safety protocol, upang masiguro ang kaligtasan ng mga manggagawa. Binigyang-diin ni Espiritu ang kahalagahan ng maagap na paghahanda laban sa panganib na dulot ng lindol, lalo na’t ang Pilipinas ay isang bansang madalas maaaring makaranas ng mga malalakas na pagyanig.
Batay sa datos ng Department of Public Works and Highways (DPWH), lumabas na mahigit 21,000 pampublikong gusali ang sinuri upang matiyak ang kanilang tibay sakaling tumama ang isang 7.2-magnitude na lindol, na tinaguriang “The Big One.”
Marami sa mga gusaling ito ang nangangailangan ng retrofitting upang umabot sa pandaigdigang pamantayan sa lindol ayon sa DPWH.
Bilang tugon, isinusulong ng TRABAHO Partylist ang isang masusing plano upang mapabuti ang workplace safety, kabilang ang mahigpit na pagpapatupad ng Building Code, regular na pagsasagawa ng safety drills, komprehensibong risk assessment, at pagsasanay sa mga empleyado ukol sa disaster response at first aid upang mas maging handa sila sa oras ng sakuna.
Layon ng TRABAHO Partylist na maprotektahan ang buhay at kabuhayan ng mga manggagawa sa harap ng mga natural na sakuna.
