Inaresto rin at pinosasan si dating Executive Secretary Salvador Medialdea dahil umano sa pagtatangka na pigilan ang mga pulis na arestuhin si dating Pangulong Rodrigo Duterte, ilang oras bago ito isakay sa eroplano patungong The Hague, Netherlands.
Isiniwalat ito ni Criminal Investigation and Detection Group (CIDG) Chief, Pol. Maj. Gen. Nicolas Torre III, kasabay ng pagsasabing masyadong mataas ang tensyon noong Martes ng gabi, bago ilipad palabas ng bansa si Duterte para harapin ang kasong crimes against humanity sa International Criminal Court.
Sinabi ni Torre na humarang si Medialdea kaya binigyan niya ito ng warning at ipinaalalang napag-usapan na nila ang mangyayari.
Aniya, hinamon siya ng dating executive secretary na arestuhin kaya binasahan niya ito ng karapatan alinsunod sa Presidential Decree 1829 o Obstruction of Justice at saka pinosasan, para ipakitang seryoso siya at hindi patatalo dahil ang batas dapat na masunod.
