Ang tonsillitis ay pamamaga ng mga tonsil na matatagpuan sa likod ng lalamunan. Maaari itong dulot ng virus o bakterya at karaniwang nararanasan ng mga bata, bagama’t maaari rin itong tumama sa mga nasa hustong gulang.
Kabilang sa mga sintomas nito ang matinding pananakit ng lalamunan, hirap sa paglunok, pamamaga ng tonsil, lagnat, pamamaos, at pamamaga ng mga kulani sa leeg.
Sa ilang kaso, makikita rin ang puti o dilaw na nana sa mga tonsil.
Kung virus ang sanhi, kadalasang sapat na ang pagpapahinga, pag-inom ng maraming tubig, at paggamit ng mga gamot para sa lagnat at pananakit.
Subalit kung bakterya ang dahilan, maaaring magreseta ang doktor ng antibiotics na dapat tapusin ayon sa payo ng manggagamot.
Pinapayuhan ang publiko na magpatingin sa doktor kung tumatagal nang higit sa dalawang araw ang mataas na lagnat, may hirap sa paghinga o paglunok, o kung paulit-ulit ang pagkakaroon ng tonsillitis.
Upang makaiwas sa sakit, mahalagang maghugas ng kamay nang madalas, iwasan ang pakikihiraman ng baso at kubyertos, takpan ang bibig kapag uubo o babahing, at panatilihing malakas ang resistensiya sa pamamagitan ng wastong nutrisyon at sapat na pahinga.
