DAPAT managot sa unprogrammed funds sina former House Speaker Martin Romualdez, dating Ako Bicol Partylist Rep. Zaldy Co at dating Marikina 2nd District Rep. Stella Quimbo.
Pahayag ito ni Caloocan 2nd District Rep. Edgar Erice, matapos ideklarang unconstitutional ng Supreme Court ang 2024 at 2025 national budgets dahil sa unprogrammed appropriations.
Binigyang-diin ni Erice na nakapaloob sa unprogrammed funds ang pondo para sa flood control at sa iba pang mga proyektong matatawag na maanomalya.
Sinabi ng kongresista na hindi mangyayari ang unprogrammed appropriations kung hindi magkakasundo ang House Speaker, chairperson at vice chairperson ng House Committee on Appropriations.
Si Quimbo ay tumayo bilang vice chairperson ng komite at itinalaga bilang chairperson nang magbitaw si Co.
Kabilang din si Quimbo sa mga miyembro ng small committee kung saan nangyari umano ang ilang insertions sa national budget.
