Ang pananakit at paninigas ng mga kasu-kasuan ay hindi dapat ipagwalang-bahala dahil maaari ito palang senyales ng osteoarthritis na isa sa pinakakaraniwang uri ng arthritis.
Ayon sa mga eksperto, ang osteoarthritis ay nangyayari kapag unti-unting numinipis o nasisira ang protective cartilage sa dulo ng mga buto.
Dahil dito, mas nagkakaroon ng pagkikiskisan ang mga kasu-kasuan na nagdudulot ng pananakit at hirap sa paggalaw.
Karaniwang naaapektuhan nito ang tuhod, balakang, kamay, at ibabang bahagi ng likod.
Kabilang sa mga posibleng sintomas ang pananakit ng kasu-kasuan, paninigas lalo na pagkagising, pamamaga, at pagkakaroon ng tunog o pakiramdam na parang may kumikiskis kapag gumagalaw.
Mas mataas ang panganib ng osteoarthritis sa pagtanda, sobrang timbang, paulit-ulit na paggamit ng kasu-kasuan, o pagkakaroon ng dating pinsala sa mga ito.
Ipinapayo ng mga health expert ang pagpapanatili ng tamang timbang, regular na low-impact exercise, pag-iwas sa sobrang bigat na binubuhat, at pagpapakonsulta kapag tuluy-tuloy ang pananakit.
Paalala ng mga eksperto: Hindi normal na bahagi ng pagtanda ang matinding pananakit ng mga kasu-kasuan—ang maagang pagpapasuri ay makatutulong para mapanatili ang maayos na paggalaw at kalidad ng buhay.
