dzme1530.ph

DEFENSE TEAM NI VP SARA DUTERTE, HINILING SA IMPEACHMENT COURT NA I-SUBPOENA ANG APAT NA WITNESS NA ISASALANG SA HEARING SA NOV. 19 AT 20

Loading

HINILING ng defense team ni Vice President Sara Duterte sa Impeachment Court na mag-isyu ng subpoena sa apat na indibidwal na isasalang sa witness stand sa paglilitis sa November 19 at 20.
 
Ito ang kinumpirma ni House Prosecution Panel Member Joel Chua matapos makatanggap din ng kopya ng request ng defense panel.
 
Batay sa request for subpoena, kabilang sa mga tinawag na prospective witnesses ay sina Atty. Rainer Dela Fuente ng AML Consulting PH na tetestigo sa fundamental legal concepts na may kinalaman sa Anti-Money Laundering Act at si Dr. Ceferino Rodolfo, Undersecretary for Industry Development and Investment Promotions Group ng Department of Trade and Industry na inaasahang magsasalaysay ng mga impormasyon may kinalaman sa Cale88 Foods Corporations.
 
Kasama rin sa pinasubpoena sina Pilar Marilyn Pagayunan, Director IV ng Center for Food Regulation and Research ng Food and Drug Administration na tatalakay naman sa product registration ng Cale88 Food Corporation at si Rowena Mendoza, General Manager III o sinumang kinatawan ng Center for International Expositions and Missions para sa electronic mail correspondences para sa Cale88.
 
Una nang inihayag ng defense panel na aabot pa sa walo hanggang sampu pang testigo ang ihaharap nila sa pagdinig.

About The Author