Ibinasura ng Quezon City Regional Trial Court Branch 81 ang reklamo at petisyon ni Atty. Manases “Mans” Carpio hinggil sa kanyang tax records for “lack of jurisdiction.”
Sa desisyon ni QC-RTC Branch 81 Presiding Judge Madonna Echiverri, “dismissed” ang petition for prohibition ni Carpio.
Denied din ang hiling na “writ of preliminary injunction” ni Atty. Carpio.
Ayon kay Judge Echiverri, hindi puwedeng mag-interfere o makialam ang hudikatura sa proseso ng impeachment sa Kongreso dahil ito’y atas ng Konstitusyon.
Si Atty. Carpio, ang kabiyak ni VP Sara Duterte, ay naghain ng reklamo sa korte para ipahinto ang impeachment hearing sa Committee on Justice, kasabay ng pagkuwestyon sa subpoena na inilabas para sa tax records nilang mag-asawa.
Naging respondent sa kaso sina Speaker Faustino Bojie Dy III, Committee on Justice Chairperson Gerville Luistro, at si BIR Commissioner Charlito Mendoza.
Tama lamang na ibinasura ni QC-RTC Branch 81 Judge Madonna Echiverri ang petisyon ni Atty. Manases “Mans” Carpio.
Ayon kay Cong. Terry Ridon, walang batayan ang kaso at ginugulo lamang nito ang kabuuang proseso sa pagpapanagot sa kanyang kabiyak na si VP Sara Duterte.
Aniya, public document ang ITRs o income tax returns at iba pang tax documents, at hindi rin ito subject ng confidentiality at privacy kung ang isyu ay nakasalang na sa constitutional at investigative proceedings katulad ng impeachment.
Sabi pa ni Ridon, sa pagkakabasura ng kaso, panahon na para tutukan ang botohan ng impeachment na naka-schedule sa darating na Lunes, May 11, 2026.
