Bumaba ang approval at trust ratings ni Vice President Sara Duterte, ayon sa pinakahuling survey ng Pulse Asia.
Sa Sept. 6 to 13 survey na nilahukan ng 2,400 respondents, bumagsak sa 60% ang performance rating ni VP Sara na mas mababa ng 9 percentage points mula sa nakaraang survey, habang 61% ang nakuha nitong trust rating na mas mababa rin ng 10 percentage points kumpara noong Hunyo.
Mula naman sa 53% ay bumaba sa 50% ang approval rating ni Pangulong Ferdinand Marcos Jr. sa nakalipas na buwan ng Setyembre, habang bumagsak din sa 50% ang kanyang trust rating mula sa 52% noong ikalawang quarter.
Samantala, nabawasan din ang approval rating ni Speaker Martin Romualdez ng 3 percentage points na mula sa 35% noong June ay naging 32% nitong nagdaang September, habang apat naman ang natapyas sa kanyang trust rating na mula sa 35% ay naging 31%.
Nakapagtala naman si Senate President Chiz Escudero ng 60% approval rating habang ang kanyang trust rating ay bumagsak sa 56% mula sa 69% noong Hunyo. —sa panulat ni Lea Soriano-Rivera
