Maaari nang gamitin ng Department of Budget and Management ang blockchain at iba pang teknolohiya upang palakasin ang online system sa monitoring ng public spending.
Ito ay makaraang lagdaan ni Pangulong Ferdinand Marcos Jr. ang Executive Order 126 na nag-i-institutionalize ng Centralized Open Monitoring Platform for Appropriations and Spending Statistics o COMPASS.
Sa pamamagitan ng EO, ang COMPASS ay magiging unified, publicly accessible platform para sa budget, expenditure, procurement at program performance information.
Gagamitin ng COMPASS ang distributed ledger technology kasama na ang blockchain at iba pang teknolohiya para sa disclosure, consolidation at publication ng budget, expenditure, procurement at iba pang transparency-related information.
Sa gitna ito ng pagkonsidera ng Kongreso ng panukalang Citizen Access and Disclosure of Expenditures for National Accountability o CADENA Act na nagpapalakas ng access sa mga impormasyon sa government spending.
