Naranasan mo na ba ang paglabo ng paningin kahit malapit o malayo ang tinitingnan? Madali ka bang mapagod sa pagbabasa o matagal na pagtutok sa cellphone at computer?
Posibleng may astigmatism ka, isang karaniwang refractive error na nakaaapekto sa linaw ng paningin.
Ang astigmatism ay nangyayari kapag hindi pantay ang kurba ng cornea o lens ng mata. Sa halip na bilog na parang bola, mas nagiging hugis-itlog o oval ang cornea, kaya hindi pantay ang pagbaluktot ng liwanag papasok sa mata.
Dahil dito, hindi nakapopokus nang maayos ang liwanag sa retina, kaya nagiging malabo o distorted ang mga bagay na tinitingnan.
Ano-ano ang mga sintomas ng astigmatism?
- Malabong paningin – Maaaring malabo ang mga bagay sa malapit at malayong distansya.
- Eye strain – Madaling mapagod ang mga mata lalo na kapag nagbabasa o matagal na nakatutok sa screen.
- Madalas na pananakit ng ulo – Maaaring makaranas ng headache dahil sa pagpupumilit ng mga mata na makapagpokus.
- Hirap makakita sa gabi – Maaaring mas mahirap makakita nang malinaw sa gabi, lalo na kapag nagmamaneho at nakakasalubong ng maliwanag na headlights.
- Pagdidilat o pagpipikit ng mata – Minsan ay pinipilit ng taong may astigmatism na pikitan o dilatan ang mata upang mas makita nang malinaw ang isang bagay.
Ano ang mga sanhi ng astigmatism?
Karamihan sa mga kaso ay kaugnay ng natural na hugis ng cornea o lens ng mata.
Maaari itong namana sa pamilya at madalas ay naroroon na mula pagkabata.
May mga kaso rin na nabubuo matapos ang eye injury, operasyon sa mata o ilang kondisyon tulad ng keratoconus, kung saan unti-unting numinipis at nagiging cone-shaped ang cornea.
Mahalagang linawin na hindi astigmatism ang resulta ng sobrang paggamit ng cellphone, pagbabasa sa madilim na lugar o panonood ng telebisyon nang malapit.
Kung biglaang lumabo ang paningin, may matinding pananakit ng mata o may biglaang pagkakita ng flashes at floaters, magpatingin agad sa ophthalmologist.
Ang maagang pagtukoy sa astigmatism at tamang pagwawasto sa paningin ay makatutulong upang mapanatili ang linaw ng paningin at maiwasan ang hindi kinakailangang pagpupumilit ng mga mata.
