Sugatan ang isang babaeng guro matapos barilin ng kanyang sariling asawa sa loob ng paaralan sa Tanauan, Leyte kaninang umaga.
Batay sa ulat ng Tanauan Municipal Police Station, nangyari ang insidente bandang 7:45 ng umaga sa loob ng Tanauan School of Craftsmanship and Home Industries sa Barangay Canramos.
Kinilala ang biktima bilang Elizabeth Mandreza, at ang suspek na kanyang asawa na si Adan Mandreza.
Tinamaan sa kanang balikat ang guro matapos barilin ng suspek gamit ang caliber .38 revolver. Matapos ang pamamaril, itinapon ng suspek ang baril at nagtangkang saktan ang sarili gamit ang balisong bago ito naaresto ng mga rumespondeng pulis.
Agad namang naisugod ang biktima sa ospital para lapatan ng lunas.
Kasalukuyang nasa kustodiya ng Tanauan MPS ang suspek at nakatakdang sampahan ng kasong frustrated parricide.
Tinitingnang anggulo ng pulisya ang umano’y “affair” ng biktima sa ibang lalaki matapos aminin ng suspek na nakita niya umano ang kanyang asawa na may kalaguyo.
