HINDI matatapos sa impeachment trial ang legal battle ni Vice President Sara Duterte.
Ayon kay Counsel for the House Panel of Prosecutors Lorna Kapunan, kahit matapos ang impeachment trial, posible pa ring maharap si VP Sara sa criminal, civil, o administrative proceedings.
Hiwalay umanong proseso ang impeachment kumpara sa iba pang proceedings gaya ng sa Office of the Ombudsman.
Habang nililitis sa Impeachment Court, puwede umanong isabay ang criminal case, civil case, o administrative case.
Naniniwala rin si House Impeachment Adviser at Spokesman Robert Ace Barbers na hindi matatapos sa Senate impeachment proceedings ang legal battle ni Duterte.
Sa ngayon, may pending plunder at graft complaints na ito sa Ombudsman mula sa grupo ni former Finance Usec. Cielo Magno, hiwalay pa sa complaint ni former Sen. Antonio Trillanes IV at ng civil society group na The Silent Majority.
Paglilinaw pa ni Kapunan, sa criminal case, proof beyond reasonable doubt ang kailangan, samantalang sa impeachment case ay “clear and convincing evidence” ang pamantayan.
