Hindi lahat ng taong may depresyon ay laging malungkot. Ayon sa mga eksperto, may mga senyales na maaaring magpakita na ang isang tao ay nakararanas ng depresyon kahit hindi ito halata.
Kabilang sa mga karaniwang palatandaan ang tuloy-tuloy na pagkalungkot o pakiramdam na walang pag-asa, pagkawala ng interes sa mga dating kinahihiligan, madalas na pagkapagod, hirap matulog o sobrang pagtulog, at pagbabago sa gana sa pagkain o timbang.
Maaari ring makaranas ng hirap sa pagpo-focus, pagiging iritable, pag-iwas sa pamilya at mga kaibigan, at pakiramdam na walang halaga ang sarili. Sa mas malulubhang kaso, maaari ring magkaroon ng mga kaisipang saktan ang sarili o tapusin ang buhay.
Paalala ng mga doktor, ang depresyon ay isang kondisyong pangkaisipan na maaaring magamot sa pamamagitan ng tamang gabay, counseling, therapy, at kung kinakailangan, mga gamot.
Mahalagang humingi ng tulong sa isang mental health professional kung ang mga sintomas ay tumatagal nang higit sa dalawang linggo o nakaaapekto na sa pang-araw-araw na pamumuhay.
Ang maagang pagkilala sa mga palatandaan ng depresyon ay mahalagang hakbang upang makatanggap ng angkop na lunas at suporta.
