“It’s official, walang rekomendasyon ang Independent Commission for Infrastructure o ICI na kasuhan si former Speaker Martin Romualdez.
Kaugnay ito sa ginagawang fake news ni Navotas Cong. Toby Tiangco na may rekomendasyon umano ang ICI para kasuhan ng plunder si Romualdez dahil sa flood control scandal.
Ayon kay Cong. Jude Acidre, malinaw ang inilabas ng ICI na “this referral is issued without any finding or conclusion of guilt or liability on the part of former Speaker Romualdez.”
Paliwanag ni Acidre, may dalawang mahalagang punto na dapat maintindihan.
Una, ang ICI ay fact-finding body na nilikha sa bisa ng Executive Order No. 94, na ang mandato ay magrekomenda sa mga kinauukulang ahensya na magsampa ng kaso. At dito wala silang inirerekomenda.
Ikalawa, ang referral ay para magsagawa pa ng independent investigation ang Office of the Ombudsman, dahil sa pagsisiyasat ng ICI, walang nakitang pagkakasala o liability laban kay Romualdez.
Dahil diyan, nagbabala si Acidre na ang “misrepresenting” sa anumang official documents ay mapanganib at sumisira sa public trust at sa tanggapan ng pamahalaan na inatasang magsagawa ng independent review.
