Dahil tinatawag na education budget ang pambansang pondo para sa 2026, tumutok sa sektor ng edukasyon ang isinulong na amendments ng ilang senador.
Kasama sa isinulong na amendments ni Senate President Vicente “Tito” Sotto ang pagtataas sa ₱185 milyon ng pondo para sa Medical Scholarship o sa implementasyon ng Doktor Para sa Bayan Act ng Commission on Higher Education.
Iginiit din ni Sotto ang paglalaan ng ₱6 milyon para sa rehabilitasyon o reconstruction ng gym ng Laguna State Polytechnic University, San Pablo Campus.
Pinabubura naman ni Senador Panfilo Lacson ang Tulong Dunong Program at ililipat ang ₱2.728 bilyon na pondo para sa Tertiary Education Subsidy upang matugunan ang funding gap na nakaapekto sa mahigit 2.3 milyong estudyante.
Isinulong din ni Lacson ang dagdag na ₱30 milyon na pondo para sa UP National College of Public Administration and Governance (UP NCPAG) Governance Reform, Innovation and Transformation Collaboratory o GRIT Labs, para sa pag-develop ng informed data analytics, evidence-based research, at capacity-building programs.
Iginiit naman ni Senador Joel Villanueva ang pagdaragdag ng ₱70 milyon sa pondo ng Technical Education and Skills Development Authority (TESDA), partikular para sa Promotion at Development ng Quality Technical Education and Skills Development Programs.
Ipinaliwanag ni Villanueva na ang alokasyon sa TESDA ay suporta sa isinasagawang digital transformation efforts, lalo na sa pagpapalakas ng technology-driven training, assessment, at program development.
