Hinikayat ng Department of Health (DOH) ang mga Pilipino na pabakunahan ang kanilang mga alagang hayop laban sa rabies taon-taon.
Ito’y matapos pumalo sa record-high na 426 ang rabies-related deaths noong nakaraang taon.
Sa datos na inilabas ng ahensya, mula sa kabuuang bilang, 193 o 45% ng mga nasawi ay kinagat ng alagang hayop, na karaniwan ay aso o pusa.
Sa total rabies cases, 41% ay bunsod ng unvaccinated pets habang 56% ay kinasangkutan ng mga hayop na hindi tiyak ang vaccination status.
Pinakamataas ang rabies cases noong 2024 sa Central Luzon na may 56; Soccsksargen, 43; at Calabarzon, 35.
Ayon pa sa DOH, sa nakalipas na limang taon, ay kabuuang 1,750 na ang mga Pinoy na namatay dahil sa rabies.
