Umakyat na sa 142 ang bilang ng mga nasugatan dahil sa mga paputok.
Ito’y makaraang makapagtala ang Department of Health (DOH) ng 17 mga bagong kaso, kahapon.
Ang pinakabagong tally ay mas mataas ng 35% kumpara sa 105 cases na naitala sa kaparehong panahon noong nakaraang taon.
Kinumpirma rin ng DOH ang unang firecracker fatality ngayong holiday season, na isang 78-taong gulang na lalaki mula sa Central Luzon.
Binawian ito ng buhay matapos maputukan ng “Sinturon ni Hudas” noong Dec. 27, na nagdulot ng pinsala sa kanyang mata at hita, at mayroon din itong pre-existing health conditions na nagpalala sa kanyang kalagayan habang nasa ospital.
Ang reported injuries na naitala simula Dec. 22 ng ala-6 ng umaga hanggang kahapon, Dec. 29, ay nakalap mula sa 62 ospital sa buong bansa. —sa panulat ni Lea Soriano-Rivera
