Ipinangalan na ang Urdaneta City Bypass Road sa Pangasinan, sa namayapang negosyante at tinaguriang “kingmaker” na si Eduardo ‘Danding’ Cojuangco Jr.
Sa ilalim ng Republic Act (RA) No. 11988 na nilagdaan ni Pangulong Ferdinand “Bongbong” Marcos Jr., tatawagin na ngayon bilang Ambassador Eduardo ‘Danding’ M. Cojuangco Jr. Avenue ang bypass road na bumabagtas sa mga Brgy. Nancayasan, Santo Domingo, Santa Lucia, Camantiles, at Anonas sa Urdaneta City.
Si Cojuangco na naging Chairman at CEO ng San Miguel Corporation at naging gobernador at kongresista ng Tarlac, ay kilalang naging malapit na kaalyado ni Dating Pangulong Ferdinand Marcos Sr.
Samantala, nilagdaan din ng Pangulo ang RA no. 11987 na nagpalit sa pangalan ng Bohol Island Circumferential Road bilang “President Carlos P. Garcia Circumferential Road”, RA 11989 na nagpangalan sa Tambacan Bridge sa Iligan City bilang “Mariano Lluch Badelles Sr. Bridge”, at RA 11990 na nagpangalan sa National Highway sa Goa Camarines Sur bilang “Speaker Arnulfo ‘Noli’ Fuentebella Highway”.
