Binigyang diin ng Department of Transportation (DOTr) ang kahalagahan ng taas-pasahe sa Light Railway Transit Line 1 (LRT-1), na epektibo ngayong Miyerkules.
Ayon sa DOTr, kailangan ang rate increase hindi lamang para matiyak ang smooth at timely maintenance sa LRT-1, kundi para makumpleto ang extension ng linya hanggang Cavite.
Inilabas ng ahensya ang pahayag matapos humirit ang ilang grupo na suspindihin ang taas-pasahe.
November 2024 nang buksan ang Cavite Extension na may limang bagong istasyon sa Redemptorist at MIA Roads, PITX, Ninoy Aquino Avenue, at Dr. Santos sa Sucat.
Dadagdagan pa ang mga istasyon sa Parañaque, Las Piñas, at Bacoor, Cavite, na inaasahang magiging operational ang mga ito pagsapit ng 2031.
Simula ngayong araw, ang maximum fare para sa single-journey tickets ay ₱55 na mula sa dating ₱45 habang ang minimum fare ay ₱20 na mula sa dating ₱15.
