Umabot na sa ₱800 kada kilo ang presyo ng siling labuyo sa ilang pamilihan sa Metro Manila ngayong Setyembre, ayon sa Department of Agriculture (DA).
Mas mataas ito kumpara sa ₱550 per kilo noong Agosto 15 at ₱350 per kilo noong Hulyo 25, 2025.
Ayon kay Agriculture Sec. Francisco Tiu Laurel Jr., bumaba ang suplay dahil sa sunod-sunod na pag-ulan dulot ng mga bagyo at habagat. Humahanap naman aniya ang ahensya ng iba pang opsyon upang maparami ang suplay ng sili sa bansa.
Binigyang-diin ng DA ang kahalagahan ng greenhouse technology at off-season planting bilang solusyon sa paulit-ulit na problema sa presyo ng sili tuwing tag-ulan.
Tinitingnan din ng ahensya ang paglilipat ng taniman ng sili sa mga lugar na hindi gaanong umuulan, gaya ng Visayas at Mindanao, upang matugunan ang lumalaking demand ngayong “ber” months.
