Nakikipag-ugnayan ang composite team ng Philippine Embassy sa Yangon, Myanmar sa mga lokal na opisyal upang kumpirmahin ang pagkakakilanlan ng mga nasagip na indibidwal mula sa malakas na lindol noong Biyernes.
Ayon sa Philippine Embassy, nakausap na ng ilan sa kanilang mga opisyal ang humahawak ng search and rescue on-site at representatives mula sa Mandalay General Hospital upang ma-identify ang mga nailigtas mula sa gumuhong Sky Villa Building.
Sinabi ng Embahada na sa ngayon ay wala pang positive identification para sa rescued persons o na-rekober na bangkay, na may koneksyon sa apat na Pinoy na pinaniniwalaang na-trap sa gumuhong gusali.
Bukod dito ay nakausap din ng team ang labing isa (11) pang Pinoy na nakaligtas mula pagguho ng Villa upang makakalap ng karagdagang mga impormasyon.
