Hindi dapat gamitin ang partylist system ng mga gustong rumaket.
Ito ang iginiit ni Senador Risa Hontiveros kaya’t inihain ang panukalang naglalayong amyendahan ang PartyList Sysem Act upang maiwasan o mapigilan ang mga pag-abuso dito.
Alinsunod sa Senate Bill 1656, nais ni Hontiveros na pagbawalan ang political dynasties sa pakikilahok sa partylist system at nagbabawal sa mga partylist nominees at representatives na may interest sa mga government contracts Iginiit ni Hontiveros na layunin ng kanyang panukala na maibalik ang naipagkait na tinig ng ordinaryong Pinoy dahil sa mga abusadong personalidad na ginamit ang partylist system bilang back door para magkaroon ng puwesto.
Tinawag pa ni Hontiveros na scammer ang partylist representative na bumoboto sa infrastructure budget habang nakikipag bid ang kanilang kumpanya para sa proyekto.
Hangarin din ng panukala na mabigyang garantiya na ang marginalized sector ay may tunay na tinig sa Kongreso at kayang ipaglaban ang kanilang karapatan at kapakanan.
