Iginiit ni Sen. Sherwin Gatchalian na dapat sabayan ng dekalidad na serbisyo ang pagtataas ng pamasahe sa Light Rail Transit Line 1.
Sinabi ng senador na dapat tiyakin ng Light Rail Manila Corporation (LRMC), na siyang nangangasiwa sa LRT-1, na maibibigay sa mga pasahero ang mas maayos at episyenteng sistema ng pampublikong transportasyon.
Kabilang dito ang pagpapataas ng bilang ng mga tren na bumibiyahe, pagpapatupad ng mas mabilis na fare collection system, at pagpapalakas ng seguridad sa mga istasyon at tren.
Binanggit din ni Gatchalian ang pangangailangan ng mas maayos na mga pasilidad sa istasyon tulad ng malilinis na palikuran, komportableng waiting areas, at functional na access features gaya ng elevators at escalators upang mapadali ang biyahe ng mga pasahero.
Ayon sa LRMC, ang taas-pasahe ay naglalayong pondohan ang pagpapabuti ng pasilidad at operasyon ng LRT-1, kabilang na ang pinalawig nitong operating hours.
Binigyang-diin ng senador na dapat maramdaman agad ng publiko ang mga ipinangakong pagbabago at hindi maging pabigat ang taas-pasahe kung hindi naman mapapaganda ang serbisyo.
