Hindi pa naita-transmit ng Kamara sa Senado ang kanilang resolusyon na nagse-sertipika na alinsunod sa 1987 Constitution ang articles of impeachment laban kay Vice President Sara Duterte.
Sinabi ni House Impeachment Prosecutor Ysabel Maria Zamora na napagpasyahan ng liderato sa kamara na maaring mag-isyu ng certification ang secretary general, para sa ikatatahimik ng lahat.
Subalit, hindi aniya ito nangangahulugan na ita-transmit nila ang certification sa Senado.
Idinagdag ni Zamora na hindi pa natatalakay ng house prosecution panel kung kailan ita-transmit ang certification sa Senado, kasabay ng pagbibigay diin na hindi nila sinusuway ang kautusan ng impeachment court, bagkus ay humihingi lamang sila ng paglilinaw.
Muli ring inihayag ng kongresista ang paninindigan ng House prosecution panel na hindi maaring i-remand o isauli ng Senate impeachment court ang articles of impeachment sa House of Representatives.
