Sinimulan nang punan ng Kamara de Representantes ang pamunuan ng ilang mahahalagang komite para sa 20th Congress.
Itinalaga bilang chairperson ng House Committee on Accounts si Davao de Oro 1st District Rep. Maria Carmen Zamora. Ang komiteng ito ang nangangasiwa sa budget ng Kongreso.
Hinirang naman bilang chairperson ng makapangyarihang Committee on Appropriations si Nueva Ecija 1st District Rep. Mikaela Angela Suansing, habang si Bataan Rep. Albert Garcia ang magiging senior vice chairperson.
Nanatili sa pwesto bilang chairperson ng Committee on Human Rights si Manila 6th District Rep. Benny Abante Jr., habang ang kapwa niya taga-Maynila na si Rep. Joel Chua ng 3rd District ay napanatili rin sa Committee on Good Government and Public Accountability o Blue Ribbon Committee.
Itinalaga naman si Marikina Rep. Romero “Miro” Quimbo bilang chairperson ng Committee on Ways and Means, habang senior vice chairperson nito si Manila Rep. Ernesto “Ernix” Dionisio.
Ang Committee on Dangerous Drugs ay hahawakan ni Bukidnon 2nd District Rep. Jonathan Keith Flores.
Si Manila 2nd District Rep. Rolando Valeriano naman ang bagong chairperson ng Committee on Public Order and Safety, habang si Cagayan de Oro 1st District Rep. Lordan Suan ang mamumuno sa Committee on Public Information.
