Aminado ang liderato ng House Committee on Justice na may kalituhan pa rin kung kailan talaga nagtapos o matatapos ang one year ban para sa panibagong impeachment complaint laban kay Vice President Sara Duterte.
Sa harap ito ng dalawang impeachment complaint na ipinagharap kahapon sa Kamara laban sa Bise Presidente.
Ayon kay Committee on Justice Vice Chair Ysabel Maria Zamora, nag-ugat ang kalituhan ng mag flip flop ang Supreme Court sa kanilang July 2025 decision at January 29, 2026 final resolution.
Sa July 2025 decision sa February 5, 2026 pa matatapos ang ban, subalit sa final resolution nito lang January 29, nagbago ito dahil sa interpretasyon sa “session day.”
Umatras umano ang timeline dahil sa ginawa ng Supreme Court na iba ang nakalagay sa desisyon, at iba rin ang sa resolusyon.
Una nito sinabi ni House Senior Deputy Majority Floor Leader at acting Chairman ng Rules Committee Lorenz Defensor na kailangan nilang i-adjust ang ginagamit na Rules on Impeachment para tumugma sa Supreme Court ruling.
