Kasado na bukas ang high-level multi-panel hearing sa Kamara de Representantes, na iniutos ni House Speaker Faustino Bojie Dy III.
Alas nuwebe ng umaga bukas, April 8, sa People’s Center Building, pangungunahan ni Marikina City Rep. Miro Quimbo, chairperson ng Ways and Means panel ang multi-panel hearing.
Sa direktiba ni Dy sa labintatlong (13) komite, sesentro ang pagdinig sa solusyon kung paano maibsan ang problemang dulot ng pagsipa ng presyo ng produktong petrolyo hindi lang sa global market kundi maging sa lokal na merkado.
Pagsasama-samahin ng multi-panel ang mga datos at makikipag-ugnayan sa Executive Branch upang bumuo ng konkretong policy interventions para sa agarang solusyon at long-term resilience.
Kasama sa pagdinig ang mga chairperson ng iba pang komite, kabilang sina:
Reps. Jose Alvarez ng Energy, Mark Enverga ng Agriculture and Food, Mikaela Angela Suansing ng Appropriations, Tsuyoshi Anthony Horibata ng Aquaculture and Fisheries, Antonio Legarda ng Economic Affairs, Deputy Speaker Maria Rachel Arenas ng Foreign Affairs.
Kasama rin sina Reps. Miguel Luis Villafuerte ng Information and Communications Technology, Ramon Jolo Revilla ng Labor and Employment, Agimat Rep. Bryan Revilla ng Overseas Workers Affairs, Reps. Cheeno Miguel Almario ng Social Services, Maximo Dalog Jr. ng Trade and Industry, at si Franz Pumaren ng Transportation Committee.
