Bukas ang pamahalaan na ibaba ang taripa sa US goods bilang tugon sa ipinataw na 17% reciprocal tariff ni US President Donald Trump sa mga produkto ng Pilipinas.
Sinabi ni Department of Trade and Industry (DTI) Secretary Ma. Cristina Roque, na pag-aaralan nila ang hakbang na ito at sa katunayan ay magkakaroon ng pulong ang economic team, sa lalong madaling panahon.
Aniya, tiyak na babawasan ang tariffs sa US products subalit pag-uusapan pa ng economic team kung hanggang saan ang maaaring ialok ng Pilipinas.
Ginawa ni Roque ang pahayag matapos magkasundo ang leaders ng US at Vietnam na pag-usapan ang “deal to remove tariffs” matapos ang “very productive phone call,” batay sa ulat ng Reuters.
Idinagdag ng Kalihim na naghahanap din ang gobyerno ng kolektibong tugon mula sa iba pang Association of Southeast Asian Nations (ASEAN) member-countries upang matugunan ang mas mataas na US tariffs.
